Azərbaycan Respublikasının İSESKO üzrə Milli Komissiyasının baş katibi, Mədəniyyət Nazirliyinin Aparat rəhbərinin müavini – Beynəlxalq əməkdaşlıq və innovativ inkişaf şöbəsinin müdiri Vasif Eyvazzadə Əbu-Dabi şəhərində keçirilən İSESKO-nun İcraiyyə Şurasının 40-cı sessiyasında iştirak çərçivəsində təşkilatın baş direktoru
Salim bin Məhəmməd Əl-Malik ilə görüşmüşdür.Görüşdə Salim Əl-Malikin Bakıya rəsmi səfərə dəvət olunması, səfərlə bağlı proqramın hazırlanması, eləcə də Azərbaycan-İSESKO əlaqələri, əməkdaşlığın vəziyyəti, elm, təhsil və mədəniyyət sahələrində həyata keçiriləcək birgə layihələr barədə fikir mübadiləsi aparılmışdır.
Vasif Eyvazzadə baş direktora Mədəniyyət naziri, Azərbaycan Respublikasının İSESKO üzrə Milli Komissiyasının sədri Əbülfəs Qarayevin salamlarını çatdıraraq Azərbaycanın İSESKO ilə əməkdaşlığa böyük önəm verdiyini, Prezident cənab İlham Əliyev və Birinci Vitse-Prezident, İSESKO-nun Xoşməramlı səfiri xanım Mehriban Əliyevanın İSESKO ilə əməkdaşlığın inkişafına daim dəstək verdiyini qeyd etmişdir. Vasif Eyvazzadə həmçinin Azərbaycanın İSESKO tərəfindən həyata keçirilən bir sıra layihə və beynəlxalq tədbirlərə ev sahibliyi etdiyini diqqətə çatdırmışdır. O bildirmişdir ki, hazırda İSESKO “Bakı Prosesi”nin əsas tərəfdaşlarından biridir.
Salim Əl-Malik Azərbaycanın İSESKO ilə əlaqələrinə, həmçinin İslam dünyasında roluna xüsusi diqqət ayırdığını, ölkə rəhbərliyinin və Mehriban xanım Əliyevanın İslam dünyasına töhfələri barədə məlumatlı olduğunu və Azərbaycana səfəri zamanı ölkə rəhbərliyi ilə görüşləri səbirsizliklə gözlədiyini bildirmişdir. Baş direktor həmçinin İSESKO-dakı yeniliklər, struktur dəyişikliyi, yeni layihələr və digər məsələlər barədə ətraflı məlumat vermişdir.
Görüşdə baş direktora Azərbaycan tərəfindən bir neçə yeni layihə təqdim edilmişdir. Lahiyələr arasında İSESKO ilə birgə “Lunchpad” proqramının və təşkilat çərçivəsində İslam dünyası üçün Yaradıcı şəhərlər proqramının həyata keçirilməsi də olmuşdur. “Lunchpad” proqramı kitabxanalarda mentor proqramlarının həyata keçirilməsini nəzərdə tutur.
Baş direktor layihələrin nəzərdən keçiriləcəyini və bununla bağlı yaxın zamanda Azərbaycan tərəfinə mövqe bildiriləcəyini qeyd etmişdir.
Görüşdə həmçinin İcraiyyə Şurasının 40-cı sessiyası çərçivəsində qəbul olunan yeni qərarlar, Məşvərət Şurasının və İnkişaf Fondunun yaradılması və bu fondun gələcək fəaliyyəti ilə bağlı müzakirələr aparılmışdır.
İcraiyyə Şurasının 40-cı sessiyası zamanı Azərbaycan təşkilatın Maliyyə Nəzarəti Komitəsinə üzv seçilmişdir.