Vəzifəsi: Nazirin birinci müavini

Əlaqə nömrəsi: +994 12 493 02 32

Rəhbərlik

Vaqif Əliyev 1953-cü il iyul ayının 17-də anadan olmuşdur. 1975-ci ildə Azərbaycan Dövlət Universitetinin fizika fakultəsini bitirmişdir. 1975-1982-ci illərdə Azərbaycan Milli Elmlər Akademiyası Təbii Ehtiyatların Kosmik Tədqiqatları İnstitutunda mühəndis, kiçik elmi işçi, qrup rəhbəri, baş müəllim vəzifələrində işləmişdir. 1982-1988-ci illərdə Azərbaycan Dövlət Universiteti komsomol komitəsinin katibi, 1988-1994-cü illərdə BDU-nun fizika fakültəsində baş müəllim vəzifəsində çalışmışdır.

1994-2001-ci illərdə gənclər, idman nazirinin 1-ci müavini, 2001-2003-cü illərdə isə gənclər, idman və turizm nazirinin 1-ci müavini vəzifəsində çalışıb. 2003-cü ildən 2011-ci ilə kimi Sumqayıt şəhər İcra Hakimiyyətinin başçısı vəzifəsini tutub. 18 fevral 2011-ci il Prezident İlham Əliyevin imzaladığı sərəncama əsasən Vaqif Əliyev mədəniyyət və turizm nazirinin 1-ci müavini təyin olunub. Fizika-riyaziyyat elmləri namizədidir (1980).

Azərbaycan Respublikası Prezidentinin 18 may 2018-ci tarixli Sərəncamına uyğun olaraq Vaqif Qadir oğlu Əliyev Azərbaycan Respublikası mədəniyyət nazirinin birinci müavini vəzifəsinə təyin olunub.

Vəzifəsi: Nazir müavini

Əlaqə nömrəsi: +994 12 493 34 63

Rəhbərlik

Sevda Yusuf qızı Məm­mə­də­li­yeva Bakı şə­hə­rin­də anadan olmuşdur. 1967-ci ildə Bakı Dövlət Uni­versitetini fərqlənmə diplomu ilə bitir­miş­dir. 1993-cü ildə fəlsəfə elmləri dok­toru alim­lik dərəcəsi, 1997-ci ildə professor elmi adı al­mış­dır. 1970-1983-cü illərdə Azər­­baycan Res­publikası Elmlər Akademi­yasının elmi təd­qiqat institutlarında əvvəl kiçik elmi işçi, son­ra böyük elmi işçi vəzifə­lərində çalış­mış­dır.

S.Məmmədəliyeva 1983-cü ildən Azər­bay­can Memarlıq və İnşaat Uni­versi­tetində pe­daqoji fəaliyyətə başlayaraq, ardıcıl olaraq do­sent, profes­sor, kafedra müdiri vəzi­fə­lə­rin­də işləmişdir.

S.Məmmədəliyeva 1997-ci ildə sosial fəlsəfə üzrə silsilə iş­lə­rinə görə Bey­nəlxalq Eko­energetika Aka­demiyasının həqiqi üzvü, 1999-cu ildə Ru­siya Ekolo­ji Aka­demiyasının xarici üzvü, 2000-ci il­də NOOSFERA Bey­nəlxalq Akade­mi­ya­sı­nın həqiqi üzvü seçilmişdir.

S.Məmmədəliyeva 2001-ci ildən Azər­­baycan Milli Elmlər Aka­demi­ya­sının müx­bir üzvüdür.

Bakı Dövlət Universiteti nəzdində fəaliyyət göstərən Doktorluq Dissertasiya Şurasının və  həmçinin Azərbaycan Milli Elmlər Akademiyasının Humanitar və İctimai Elmlər bölməsinin Büro və  Fəlsəfə, sosiologiya və hüquq institutunun nəzdində fəaliyyət göstərən D.01115 nömrəli Dissertasiya Şurasının müxtəlif illərdə üzvü olub.    

1999-cu il 4 avqust tarixində Azərbaycan Respublikasının Prezidenti Zati-aliləri Heydər Əliyevin sərəncamı ilə Azərbaycan Respublikası mədəniyyət nazirinin müavini,  2006-cı ildə Azərbaycan Respublikası Mədəniyyət Nazirliyi ləğv edildikdə və onun əsasında Mədəniyyət və Turizm Nazirliyi yaradıldıqdan sonra  Azərbaycan Respublikasının Prezidenti Zati-aliləri İlham Əliyevin 2006-cl il 7 fevral tarixli sərəncamı ilə Azərbaycan Respublikası mədəniyyət və turizm nazirinin müavini, 20 aprel 2018-ci ildə isə Azərbaycan Respublikası Mədəniyyət və Turizm Nazirliyi ləğv edildikdə və onun əsasında  Azərbaycan Respublikasının Prezidenti Zati-aliləri İlham Əliyevin sərəncamı ilə  Mədəniyyət Nazirinin müavini təyin edilib.

S.Məmmədəliyeva Avropa Şurasının "Sta­ge", "Kiyev təşəbbüsü",  YUNESKO-nun "Mədəni çeşidlilik", "GUAM ölkələrinin mədəniyyət üzrə obser­va­toriyası" proqramla­rının milli koor­di­na­to­ru­, Avropa Şurasının "Mədəni siyasət” üzrə milli məruzənin müəl­liflərindən biri olub. 1999-cu ildən Avropa Şurasının Mədəniyyət üzrə Rəhbər Komitəsinin üzvü, 2007-2011-ci illərdə isə Bürosunun üzvü olub.

YUNESKO-nun Qeyri-maddi Mədəni İrs üzrə Reprezentativ Siyahısına daxil edilmiş on üç  qeyri-maddi mədəni irs  nümunəsi namizədlik sənədləri və onların elmi əsaslandırması Məmmədəliyevanın rəhbərliyi altında işlənib hazırlanmışdır. Azərbaycan Respublikası Prezidentinin  Sərəncamı ilə Yunesko üzrə Azərbaycan Respublikasının Milli Komissiyasının sədr   müavinidir.                                                                                                                                                                                                                                                                                            

2010-cu ildən Ümumdünya Mədəniyyətlərarası Dialoq Forumunun Beynəlxalq işçi qrupunun rəhbəri, “Bakı Prosesi” Beynəlxalq İşçi Qrupunun üzvü, Ümumdünya Mədəniyyətlərarası Dialoq Forumlarının, Bakıda 2013-cü ildə keçirilmiş YUNESKO-nun Qeyri-maddi mədəni irs üzrə Hökumətlərarası Komitəsinin 8-ci Sessiyasının və 2016-cı ildə keçirilmiş BMT Sivilizasiyalar Alyansının 7-ci Qlobal Forumunun Təşkilat komitəsinin sədr müavini təyin olunmuşdur.

Azərbaycanda və xarici ölkələrdə, o cümlədən BMT, YUNESKO, İSESKO, TÜRKSOY, MDB, GUAM, Avropa Şurasının qərargahlarında və komitələrində keçirilmiş 100-dən çox beynəlxalq simpozium, forum və konfranslarda Azərbaycanı təmsil etmişdir.

 Fransa, Çexiya, İtaliya, Yunanıstan, Macarıstan, Latviya, Polşa, İraq, Dağıstan və Sankt-Peterburq (Rusiya) Hökumətlərarası Komissiyasının üzvüdür.

Sosial fəlsəfə və kulturologiya sahəsində beynəlxalq və respublika səviyyəli elmi forum, simpozium, konfransların iştirakçısıdır. 120-dən çox elmi işin, o cümlədən sosial-fəlsəfə və kulturologiya sahəsində 12 monografiya və  kitabın müəllifidir.

Son illərdə nəşr edilmiş "Azərbaycanda mədəniyyət siyasəti", "Qloballaşma dövründə mədəniyyət", "Mədəniyyət və insan", “Культура устойчивого развития: от идеи к реальности”, «Диалог культур и вызовы современной эпохи» : материалы Бакинского форума, посвященного памяти Гейдара Алиева” kitabında çap edilmiş «Культура и исторический процесс» adlı məqalənin müəllifidir.

YUNESKO ilə birgə “Fərqliliklə razılaşaq” və Azərbaycan Respublikası Prezidenti cənab İlham Əliyev və BMT-nin Baş katibi Ban Ki Moonun önsözü ilə BMT Sivilizasiyalar Alyansının 7-ci Qlobal Forumu şərəfinə nəşr edilmiş “Mən, Biz, Bizə” kitabının hazırlanmasında yaxından iştirak edib.

1996-cı ildə elm, mədəniyyət və təhsil sahəsində xidmətlərinə görə akademik Yusuf Məmmədəliyev adına  "Bilik" Azərbaycan Maarif Cəmiyyətinin, Rusiya Federasiyasının XİN nəzdində Rusiyanın Elmi və Mədəni Əməldaşlıq üzrə Mərkəzinin “Dostluq işinə verilən töhfəyə görə” , 2005-ci ildə Fransız Elmi Cəmiyyətinin , 2013 –ci ildə Azərbaycan Respublikası və TÜRKSOY təşkilatı arasında mədəniyyət sahəsində göstərdiyi dəstəyə görə “TÜRKSOY”  medaları  ilə təltif edilib.

2008-сi ildə Fransa Respublikasının "İncəsənət və Ədəbiyyat sahəsində xidmətlərinə görə" zabit ordeni, 2013-cü ildə İtaliya Respublikasının "Şərəf" ordeni, 2015-ci ildə Avstriyanın Elm və İncəsənət üzrə fəxri ordeni, habelə Azərbaycanda diplomatik xidmətin yaranmasının 100 illiyi medalı ilə təltif edilib.

 2016-ci ildə Azərbaycan mədəniyyətinin  inkişafında xidmətlərimə görə 3-cü dərəcəli “Vətənə xidmətə görə” ordeni ilə təltif olunub.

Azərbaycan Respublikası Prezidentinin 1 avqust 2019-cu il tarixli Sərəncamı ilə 2019-cu il 30 iyun-10 iyul tarixlərində UNESKO-nun Ümumdünya İrs Komitəsinin 43-cü sessiyasının Bakı şəhərində yüksək səviyyədə təşkili və keçirilməsində, həmçinin Şəki şəhərinin tarixi mərkəzi ilə birgə Şəki Xan Sarayının Dünya İrs Siyahısına salınmasında fəal iştirakına görə 2-ci dərəcəli “Vətənə xidmətə görə” ordeni ilə təltif edilib.

Ailəlidir, bir oğlu var.

Vəzifəsi: Nazirin birinci müavini

Rəhbərlik

Elnur Əli oğlu Əliyev 1979-cu ildə Bakı şəhərində anadan olub. Azərbaycan Dövlət İqtisad Universitetində bakalavr (1999-cu il) və magistr (2001-ci il) dərəcələrini əldə edib. 2009-2013-ci illərdə Böyük Britaniyanın Mançester Biznes Məktəbinin Maliyyə üzrə Biznes İdarəedilməsi (MBA) proqramını müvəfəqiyyətlə bitirib.

Elnur Əliyev 2000-2004-cü illərdə Xarici İşlər Nazirliyində çoxtərəfli diplomatiya sahəsində çalışıb, regional təşkilatlar çərçivəsində (Aİ, QDİƏT, GUAM, ECO və s.) əməkdaşlığa töhfə verib və bir sıra regional əməkdaşlıq qruplarında sədrlik edib. 2004-2008-ci illərdə Azərbaycanın Belçika Krallığındakı Səfirliyində işləyib və müxtəlif sahələrdə Azərbaycan və Aİ arasında əməkdaşlığın əlaqələndirilməsinə məsul olub.

E.Əliyev 2008-2017-ci illərdə Ciddədə yerləşən İslam İnkişaf Bankına müxtəlif vəzifələrdə, o cümlədən beynəlxalq ticarətin maliyyələşdirilməsində MDB üzrə baş menecer vəzifəsində çalışıb.

Elnur Əliyev 2017-2020-ci illərdə Azərbaycan Respublikasının Birləşmiş Ərəb Əmirliklərindəki (BƏƏ) Səfirliyində ticarət nümayəndəsi vəzifəsində çalışıb. 2017-ci ildə Azərbaycan Respublikasının Prezidentinin  müvafiq Sərəncamı E.Əliyevə ikinci dərəcəli fövqəladə və səlahiyyətli elçi diplomatik rütbəsi verilib. 2020-ci ildə Azərbaycan Respublikası mədəniyyət nazirinin müşaviri vəzifəsinə təyin edilib.

2020-ci ildən Nizami Gəncəvi Beynəlxalq Mərkəzinin Himayəçilər Şurasının sədridir.

Elnur Əliyev 2021-ci ildə Azərbaycan Respublikasının Prezidentinin müvafiq Sərəncamı ilə mədəniyyət nazirinin birinci müavini vəzifəsinə təyin edilib.

E. Əliyev ingilis, rus, fransız dillərində danışır.

Evlidir, üç övladı var.