F.Köçərli adına Respublika Uşaq Kitabxanasının təşkilatçılığı ilə Beynəlxalq Kitab Bağışlama Günü ilə əlaqədar “Yaşa” Mərkəzində “Kitabla sevinək – kitabla yaşayaq” adlı tədbir keçirilib.
Tədbirdə əsas məqsəd insanların asudə vaxtlarını maraqlı təşkil etmək, onları daha aktiv həyata cəlb etməklə kitab və mütaliəyə marağı artırmaqdır.
Tədbir “Kitabxana və Könüllülər - yeni imkanlar məkanı” layihəsi çərçivəsində reallaşıb.
Respublika Uşaq Kitabxanasının direktoru Şəhla Qəmbərova Beynəlxalq Kitab Bağışlama Günü haqqında məlumat verib və daha sonra Xalq şairi Vahid Əzizi tədbir iştirakçılarına təqdim edib. O, şairin yaradıcılığının böyük bir qisminin məhəbbət mövzusunda olduğunu qeyd edib.
Tədbirdə V.Əziz keçdiyi həyat yolundan, bədii yaradıcılığından söhbət açıb, şeirlərini söyləyib. Sonra Xalq şairi “Dözmək olmur” şeirlər kitabını mərkəzin rəhbərliyinə hədiyyə edib.
Sonda kitabxana tərəfindən 150-dən çox kitab və jurnallar “Yaşa” Mərkəzinə hədiyyə edilib.