7 noyabr 2019-cu il tarixində Qara Qarayev adına Mərkəzi İncəsənət Məktəbində Nərimanov Rayon İcra Hakimiyyəti, YAP Nərimanov rayon və YAP Xətai rayon Gənclər Birliyinin birgə təşkilatçılığı ilə Dövlət Bayrağı Gününə həsr edilmiş “Bayrağımız-qürurumuzdur!” adlı tədbir keçirildi.
Məktəbin xor kollektivi, Respublikanın Əməkdar müəllimi Zenfira Nurullayevanın rəhbərliyi ilə Azərbaycan Respublikasının Dövlət Himninin canlı ifası, dahi bəstəkar Üzeyir Hacıbəylinin “Koroğlu” operasının Üvertürasının səsləndirilməsi ilə Dövlət bayrağının səhnəyə gətirilməsi ilə başlanan tədbirdə Bayraq gününə həsr olunmuş videoçarx təqdim olundu.
Tədbirdə millət vəkili Hikmət Babaoğlu, YAP Nərimanov rayon Təşkilatının sədri Təmraz Tağıyev, Nərimanov rayon Gənclər və İdman İdarəsinin rəisi Nəcəf Novruzov, YAP Gənclər Birliyinin ofis rəhbəri Elmar Məmmədovla yanaşı hər iki rayonun fəal gəncləri iştirak edib.Tədbirdə çıxış edənlər bayrağımızın tarixi barədə ətraflı məlumat veriblər.
“Üçrəngli bayrağımız bu gün dünyanın 70-ə yaxın ölkəsində Azərbaycanın müxtəlif diplomatik nümayəndəlikləri üzərində dalğalanır. Beynəlxalq tədbirlərdə, idman yarışlarında qaldırılır və bu hər bir soydaşımızın qəlbini iftixar hissi ilə doldurur. Xalqımızın ən böyük arzusu bayrağımızın işğal olunmuş ərazilərimizdə dalğalanmasını görməkdir.” – deyə tədbirdə vurğulanıb.
Dövlət Bayrağının hər bir Azərbaycan vətəndaşının qürur mənbəyi, müstəqil dövlətimizin isə şərəfi, qüdrəti olduğu və gənc nəslin vətənpərvərlik ruhunda formalaşmasında böyük rol oynadığı xüsusi vurğulandı.
Rəsmi hissədən sonra tədbir bədii hissə ilə davam etdi. Musiqişünas Pərvin Səfərli qonaqlara Qara Qarayev adına Mərkəzi İncəsənət məktəbinin şagirdlərinin ifasında vətənpərvər ruhda səslənən bir-birindən maraqlı musiqi nömrələri təqdim etdi: müəllim Nuray Bayramova (A.Bəbirov: “Prelüd-skerso”), Nigar Rəhimova (Ü.Hacıbəyov: ”Çırpınırdı Qara dəniz”), “Alov” (“Bayraq” rəqsi), “Səbinə” (“Sarı gəlin” rəqsi) rəqs kollektivləri, UESS estrada sinfinin (M.Vəkilov: “Ey, Azərbaycanım!”) çıxışları dinləyicilər tərəfindən alqışlarla qarşılandı. Musiqi nömrələrinin ifası zamanı maraqlı videomaterialların nümayişi tədbirə xüsusi rəng qatdı.
Solistlər Mənzurə Abdurahmanova, Rabil Şirəliyev, xor və rəqs sinfinin ifasında “Vətənim Azərbaycan!” mahnısının möhtəşəm ifası və qonaqların gurultulu alqışları ilə tədbir yekunlaşdı.
